UMTLAMO WOKUSEBENZELA AMAKHASTAMA
UMTHETHOPATHO WOKUSEBENZELA AMAKHASTAMA
Sisiphalazela ukuba hlangana nabaphambili ngomsebenzi ephasini.
Kungani kufuneka iSiko lokuba hlangana nabaPhambili ngomSebenzi eHlanganweni
Ukwaneliseka kutjho izinga lokuthokoza komuntu ngokuqala ukuthi ipahla ayitholileko namkha umsebenzi enzelwe wona ukghona kangangani ukwenza lokho abekakulindele kiwo.
Amagama wenembombono
Kukwenzela amakhastamana umsebenzi obalwa hlangana nephambili ephasini.
Ukukghonakaliswa kwenembombono
Kuphakamisa izinga lomsebenzi owenzelwa amakhastamethu ngokususa amehlo neengqondo zabantu bethu ehlelweni elinqophe ukuthengisa kwaphela, ziqale ehlelweni eliqalelela amakhastama - ngaleyindlela-ke kuzokuzaliseka iintlhogeko neemfuneko zamakhastama eBhanga nemsebenzini wayo.
Isibopho
Ukusebenzela amakhastama wethu kuhle khulu yinto esihlala siyomele ngeenkhathi zoke, ngoba siyazi ukuthi ikhwalithi yinto olindele ukuyithola eBhanga yezeeNarha (i-Land Bank). Nakube uyaneliseka ngomsebenzi owenzelwe wona namhlanje, sibawa bona utjele umkhozakho. Nakube awukakwanelisi, bikela umNqophisi wegatja leBhanga le endaweni yangekhenu. Nakungasinjalo, ungafowunela umNyango wethu oqalelela zamakhastama enomborweni ethi: 0800 00 52 59.
Sekuqakatheke khulu ukuqalelela ukwenza amakhastama wethu ahlale angawethu. Indlela ezakusetjenziswa yiBhanga yezeeNarha ukwenza amakhastama ahlale angawethu kukuwenzela umsebenzi oncono ngokuzalisa nokwanelisa iintlhogeko zawo.
Esikhathini esidlulileko iBhanga yezeeNarha pheze beyitjhagala yodwa ekundleni, inganambangi, ngalokho-ke akunamzamo okhethekileko ebewusenziwa wokuthokozisa amakhastama. Namhlanjesi-ke iBhanga yezeeNarha seyiphalisana namabhanga ajayelekileko ngamakhastama. Amakhastama la-ke selanemikhiqizo nemisebenzi eyenzelwa amakhastama angazikhethela hlangana nayo. Amakhastama wanamhlanje selanelwazi elinabileko, futhi selafuna ukwaneliswa khudlwana. Indlela esele alindele ukuthola ngayo ikhwalithi emsebenzini enzelwa wona iphakanyiswe mikhiqizo ephezulu nemisebenzi yezinga eliphezulu enzelwa yona. IBhanga yezeeNarha nayizakukghona ukuhlala inamakhastama wayo nobujamo bayo ekorweni yezeemali, kufuneka isikokambiso elitjha lokusebenza kwehlangano, ngoba phela ziinkampani eziqalelela amakhastama kwaphela ezizakuphumelela; lezo-ke ziinkampani ezizakukghona ukuwenzela umsebenzi wezinga eliphezulu amakhastama eziwaqotheleko. Ukwenza amakhastama ahlale amakhastama wekampani namkha wehlangano akusimsebenzi womNyango wezokuMaraga nezokuThengisa nje kwaphela. UmNyango wezokuMaraga ungaphumelela kwaphela eenkampanini iminyango yazo nabasebenzi bazo abaphumeleleko ukuhlangana batlame babe basebenzise ihlelo lezinga eliphezulu eliqalelela amagugu wamakhastama.
Lokho okungeze kwalinganiseka akusoze kwalawuleka. Nasizakukghona ukuthokoza abasebenzi bethu ngokusebenza kuhle emisebenzini yabo eyisika, kufuze sikghone ukulinganisa izinga lomsebenzi nekhwalithi.
Simema boke abasebenzi ukuthi babe nesandla kilomTlamo wehlelo lokusebenzela amakhastama eBhanga yezeeNarha. Ukuhlanganyela kwakho kilomThethopatho kuqakatheke khulu epumelelweni yeBhanga yezeeNarha.
Kuyini ukuba hlangana nabaphambili ngomsebenzi ephasini
Kutjho ukwenza koke umuntu angakghona ukukwenza ukwenza iqiniso lokuthi iyararululeka imiraro yamakhastama. Kutjho ukukhamba indlela engezelelweko. Kutjho ukungezelelangezelela kancani phezu komsebenzi umuntu abekelwe ukuthi awenze, abanye abangakwenziko. Lokhu-ke kuphathelene noMOYA UMUNTU AWUTHATHA NGAWO UMSEBENZAKHE. Kutjho ukuba nomoya omuhle, ukuzikhuthaza, nokuba majadu emsebenzini umuntu awenzako. Kutjho ukuhlala ngesikhathi soke umuntu umsebenzakhe awenza ngamandla wezinga eliphezulu angakghona ukufikela kilo. Kutjho ukuthanda umsebenzakho nokuzikhakhazisa ngawo. Kutjho ukuzikhakhazisa ngokusebenza eBhanga yezeeNarha.
Uyini umTlamo wokuSebenzela amaKhastama weBhanga yezeeNarha
UmTlamo wokuSebenzela amaKhastama ukhuluma ngokuthi amakhastama enzelwa njani nangokuthi kungani enzelwa umsebenzi omuhle khulu ngaphezu kokujayelekileko. Ngokulandela iinlimukiswezi, uzazakhela ilimuko elithokozisa khulu ebasebenzini nemakhastameni ngokufanako.
UmTlamo wokuSebenzela amaKhastama yikombandlela yakho ekukhombisa indlela yokusebenzela amakhastama ezikweni lokuwasebenzela. Omunye weminqopho iBhanga yezeeNarha efuna ukuphumelelisa ngayo umsebenzi kukuba nobuhle ebenze phezu kwezinga lepilo yabo boke abantu. Wena-ke, njengomZenda weBhanga le lapho ukhona, unethuba elingakavami lokuba ngomunye walabo abatjhugulula ipilo yabantu! Uyincenye yehlelo lokuzalisa ikghono namandla wabantu ngokubenza bakghone ukuthola imali yamabhudangwabo, babe bakghone nokuhlala banayo. Asikaqali kwaphela ukwakha nokuthuthukisa abantu bangaphandle, kodwa siqale ngitjho nokwakha nokuthuthukisa abasebenzi bethu. UmTlamo lo uzakusiza ukuthi ukhule ube mumuntu owatjhejako amakhastama, nowutjhejako umsebenzi. Sithanda ukukhuthaza boke abasebenzi beBhanga yezeeNarha ukuthi bazijayeze lamaphuzu angenzasi. Asikhuthazaneni woke amalanga ukuthi singagcini ngokusebenza ngamandlethu kwaphela, kodwa sirhatjhe nomoya wetjisakalo ekuqalaneni kwethu nepilo nomsebenzi!
Ikambisosivumelwana Yendlela Yokusebenza Kibo Boke Abasebenzi
Ukusebenzisana namakhastama: ukubonana amehlo namehlo/ikulumiswano yokubonana
Yamukela woke amakhastama ngaphandle kokuriyada, ngokuqalana nawo ngemehlweni, umomotheke. Nakube awukghoni ukusiza amakhastama khonokho nakafikako, atjele ukuthi uzawatjheja msinyana nawuqeda lokho okusakubambileko.
Alotjhise woke amakhastama alinde endaweni yokulinda ngaphandle kokukhetha ukuthi asizwa nguwe namkha ngomunye, uthi ungawalotjhisa uwabuze ukuthi besele alitholile na isizo, ubuze nokuthi ungawasiza ngani nakube kukhona angakasizwa. Nasele ulungele ukusiza ikhastama, bobotheka, ulilotjhise, unxanxabeze nakube besele lilinde isikhatjhana, bese uzazisa kilo ngokulitjela ibizo lakho. Isibonelo: Lotjhani, ngiyanxanxabeza ngokulinda kwakho isikhathi. NginguBathabile ( namkha nginguNaKabini), ngingakusiza ngani namhlanje Sebenzisa ilimi lomzimba elifaneleko, nephimbo elifaneleko.
Thola ibizo lekhastama okhuluma nalo, uthi ungalithola uvame ukumbiza ngalo nawukhulumisana nalo. Yenza neqiniso lokuthi ibizo lalo uliphimisela ngendlela engiyo.
Yenza ikhastama lizizwe liqakatheke khulu ngokuthi ucocacoce nalo la kukghonakala khona ( isibonelo: buhle khulu ubujamo bezulu namhlanje ngaphandlapha, uyabubona na ).
Iba nesisa, ungabandlululi, ube nomoya omuhle.
Tjengisa ukuba nefundiso ehle, uveze nesithunzi esihle, ube nomoya omuhle soke isikhathi.
Ungavumeli amakhastama ezwe iinkulumiswana zangeqadi, nanyana kungefowuni nanyana hlangana nabasebenzi. Vula ingqondwakho wenze izinto ngendlela obona zifanele ngakho. Ungathomi uphendule iselifowunakho ungakabawi imvumo ekhastameni ntanzi, bese uthi ungayithola imvumo, sele uqedile ukukhuluma nayo, unxanxabeze ekhastameni.
Nawusikimako etafulaneni la nikhulumiselana khona, litjele ikhastama bona kuba yini usikima.
Lalela ulalelisise, wenze neqiniso lokuthi ubuza yoke imibuzo ekufuze uyibuze engahle iveze imininingwana efaneleko nefunekako. Yenza iqiniso lokuthi uzwisisa yoke into ekhulunywa likhastama, ngitjho nanyana kungatjho ukuthi uthole utoligi azonitoligela. Yenza iqiniso lokuthi uwuzwisisa kuhle umraro ekufuze urarululwe, ngaphambi kobana ungalinga ukuwurarulula.
Phatha woke amakhastama ngehlonipho ekulu, futhi ungathomi ukhohliswe yindlela ikhastama elibonakala lingiyo nawuliqala ngaphandle. Woke amakhastama aphathe unga makhastama angaba ngaphambili.
Thatha isikhathi ukuhlathululela ikhastama ukuthi kungani isibawo salo sokubolekwa imali singakaphumeleli.
Nakube ikhastama alikakulungeli ukubolekwa imali ngekoro yeThusi(Bronze) namkha yeSiliva namkha yeGolidi, lemukisa ikhastamelo ukuthi lingehlela ekorweni yokubolekwa imali esezingeni eliphasanyana ( ukusukela eThusini ukwehlela ku-Step Up). Thatha isikhathi sakho ngokusiza ikhastama ngalokho okulifanele ncono kunokhunye, okuzakukghona ukulisiza ncono etlhogweni neemfunekweni zalo.
Nakube kunesililo esikhona, kufuze silungiswe mNqophisi weGatja.
Ungakhombi elinye ihlangothi leBhanga ngomuno namkha ukhombe umZimkhulu weBhanga nakube kukhona la kutjhapheke khona. Qalana nawo ngokwakho umraro loyo uwuthathe njengewakho, namakhastama ungaje uwanikele isikwelede sesikhatjhana la kufuneka khona.
Khuthaza amakhastama ukuthi azalise amaforomu anemibuzo ebuzwa wona malungana nomsebenzi enzelwa wona yibhanga le nokuthi aphatheka njani, awaphosele ebhokisaneni leemphakamiso elikhona eBhanga yezeeNarha.
Ungathomi uliyane nomlingani wakho nakasasiza elinye ikhastama.
Ungathomi wenze imisetjenzana engakaphathelani namakhastama phambi kwawo asalindile.
Vala ikulumo yakho kelinye nelinye ikhastama ngokulithokoza ngokulibiza ngegama, nangokulifisela ilanga elihle.
Tjela ophendula amafowuni nakube awukghoni ukuphendula amafowuni eza kuwe.
Ungatherhi ifowuni ukuthi ingakghoni ukulila, namkha uyilise ilile yodwa.
Nxanxabeza ngokulindisa ikhastama isikhathi nakube kwenzekile ukuthi ilile isikhathi eside khulu ngaphambi kobana uyiphendule.
Phendula ngalendlela:
Nakunguwe mathupha ophendulako:
Buza ikhastama uthi ngikhuluma no... kobanyana uzokuthola ibizo lalo.
Thola ibizo lekhastama uvamise ukulibiza ngalo nawukhuluma nalo. Yenza iqiniso lokuthi uliphimisela ngendlela elungileko ibizo lekhastama.
Ungabambisi ikhastama isikhathi eside khulu efowunini. Kunobanyana ulibambise isikhathi, kungaba ncono ukuthi ulibawe ukuthi ulifowunele ngokukhamba kwesikhathi, namkha uthathe umlayezo.
Yenza iqiniso lokuthi uyithatha kuhle imininingwana yomlayezo.
Yoke imilayezo idlulise kungakapheli amatjhumi amathathu wemizuzu uyitholile ( sekubalwa nenothisi yomlayezo etlolwe yabekwa etafuleni yomuntu othunyelwe umlayezo loyo.)
Imibuzo yamakhastama ngama-akhawundi wawo/iinghonghoyilo
Khuluma iqiniso ngalokho okungalindelwa likhastama nakube umraro awukghonakali ukurarululwa khonokho. Sebenzisa ilwazi lakho lelilimuko ukubeka isikhathi namalanga wokuvala. Nakube kurhabeke khulu, indaba leyo idlulisele kumNqophisi weGatja msinyazana.
Yoke imiraro ithathe njengemiraro eqale wena, efuna wena beyirarululeke. Ungadluliseli imiraro kamanye amagatja butjhweleni.
Imiraro irarulule msinyana ngokungakghonakalako, bese ufowunela ikhastama ulitjele ngobujamo bomraro loyo.
Hlala unande utjela amakhastama ngobujamo bemirarwabo.
Ungathomi udlulisele ikhastama e-ofisini yomNqophisi oPhetheko. Idlulisele eZikweni eliQalelela amaKhastama enomborweni ethi: 0800 00 52 59.
Nasele uqedile ukusiza ikhastama ngomraro ebeliwufowunele, libuze uthi: Kukhona okhunye engingakusiza ngakho namhlanje
Nxanxabeza nakube isibawo sekhastama asikghonakali ukuzaliseka, futhi hlala ngaso soke isikhathi uveza enye indlela ikhastama elingasizeka ngayo.Isibonelo: I-Step-Up ( yezinga eliphasanyana).
Thulula ibhokisana leemphakamiso qho ngeveke.
UmNqophisi weGatja akatjheje iindaba nemiraro ekhona ngaphambi kobana angadlulisela iimphakamiso ezitholakeleko emZimkhulu kobana ziyokucozululwa khona.
Ukuphathwa kwegatja elisebenzela amakhastama
Akuthi nakufika isikhathi sokuvula ukube senikulungele ukusebenza.
Nakufika isikhathi sokuvala(sokutjhayisa) ungapharhazelisi amakhastama ngokuwajarha; kufuze soke isikhathi nihlale nizimisele ukusiza amakhastama ngitjho nangemva kobana senivalile, nakasasese khona amakhastama nakufika isikhathi sokuvala.
Elinye nelinye ikhastama kufuze bona lisizwe kungakapheli imizuzu elitjhuminahlanu lifikile. Nakube kuyenzeka ukuthi ikhastama lilinde isikhathi eside kunalokho, litjele, unxanxabeze ngokulinda kwalo isikhathi bese uyalitjela ukuthi lisezakulinda isikhathi esingangani.
Ukuphathwa kwabasebenzi abasebenzela amakhastama
Umsebenzi wokufundisa nokuthwasisa abasebenzi wawoke amalanga kufuze ufake netjhumi lemizuzu leKulumo yokuJayeza abasebenzi ( eyethulwa mNqophisi weGatja) ngaphambi kokuvulwa kwama-ofisi egatjeni.
Ukuthi omunye nomunye umsebenzi usebenza njani kufuze kuqalwe mNqophisi weGatja:
Ukuthi umuntu uthatha isikhathi eside kangangani ukubuyela emakhastameni ngemiraro /ngeenghonghoyilo zawo.
Umoya umuntu asebenza ngawo nabanye namakhastama nesisa anaso.
Ikghono lakhe lokuphumelelisa umsebenzakhe.
Ilwazi lakhe lomsebenzi.
Imizamo engezelelweko umuntu ayenzako ukuphumelelisa umsebenzakhe.
Iimbawo zokubolekwa imali
Hlala ubikela amakhastama ngobujamo beembawo zawo woke amalanga nangeveke.
Kuncono amakhastama uwafonele kunobanyana uwatlolele iincwadi.
Iincwadi
Iincwadi kufuze zitloleke ngelimi elihle elipeledeke kuhle, elinganamitjhapho.
Ungathumeleli amakhastama iincwadi ezitlolwe ngesandla.
Sebenzisa iphepha elinemininingwana efaneleko etlolelwe futhi yeendlela zokuthinta igatja lakho. Qalisisa ukuthi imininingwana etlolelwe futhi ekugcineni kwephepha ilungile nokuthi iphethe yoke imininingwana emitjha yegatja lenu.
Ungasebenzisi amaphepha amadala, aneminingwana yesiphande emidala, neemvilobhi ezindala, njalo njalo.
Ama-computer wenu akasebenzise ihlelo lokuhlola ukupeleda lelimi lelo ekutlolelwa ngalo amakhastama.
Tjheja uyelele ukuthi amaMemorandamu ngawokusetjenziswa ngekhaya kwaphela ( ngamanye amagama ngawokusebenza ema-ofisini wenu kwaphela.)
Ukwenza amakhastama ahlale angawenu
Hlala ulandelela zoke iimali zokubolekiswa ezikhanseliweko, namakhastama aqedileko ukubhadala iinkwelede zawo.
Umsebenzi owasebenza ngesikwelede sekhastama elithileko (nakukghonakalako) kufuze ukuthi avakatjhele ikhastamelo namkha alifowunele ukuthola ukuthi kwenziwe yini livale isikwelede salo, alikhuthaze nokuthi liragele phambili ngokubuya azokwenza enye ibhizinisi khona la eBhanga yezeeNarha.
Kufuze kwenziwe imizamo yokuwenza ahlale amakhastama wamabhizinisi.
Amakhastama akhansela namkha abhadala iinkwelede zawo aziqede athumelele iphetjhana lemibuzo lokugcina.
Isithunzi segatja
Elinye nelinye igatja kufuze liveze litjengise imitlikitlo esemthethweni ngekhaya nangaphandle.
Isikhathi somsebenzi kufuze bona sitlolwe kuhle sibonwe mumuntu woke.
Yoke imitlamo yemigwalo ye-decalcomania kufuze bona ibe sebujameni obuhle. Amatshwayo we-computer natlolwe ngesandla ephepheni ananyathiselwa eminyango nemithangaleni akakavunyelwa, kufuze asuswe kufakwe amatshwayo agadangiswe samgwalo ( printed signage.)
Amatshwayo agadangiswe samgwalo lawo akukafaneli bona ananyathiselwe ngeselotheyibhu.
Woke amatshwayo wemigwalo wangaphandle kufuze bona ahlanzeke, futhi asebenze nakube ngakhanyisako.
Woke amatshwayo asamigwalo wangaphakathi kufuze bona ahlanzeke futhi abe sebujameni obuhle.
Amathikithana atlolwe amabizo wabantu kufuze bona ahlale aqobotjhelwe emuntwini ngaso soke isikhathi.
Akunamsebenzi ovunyelwe ukubhema nokudla nokusela phambi kwamakhastama kiyo yoke indawo ema-ofisini walapha.
Zoke iindawo ezibonakala phambi kwamehlo wamakhastama azihlale zihlanzekile, ziqaleka njengezabantu abenza umsebenzi webizelo.
Yenza iqiniso ngeenkhathi zoke ukuthi isithunzi segatja lenu sihlala sisihle, futhi la kufuneka khona, ipahla eyonakeleko namkha engasebenzi kuhle ayisuswe ijanyiselelwe ngenye.
Imithangala yomakho ayihlale ihlanzekile.
Amafesidiri awahlale ahlanzekile, aphelele, angakaphuki.
Amaphasi nawo awahlale ahlanzekile.
Amalerhe kufuze abe sebujamweni bokusebenza. Iindawo la kusizelwa khona amakhastama kufuze zihlale zikhanya kuhle.
Iintjalo azihlale zihlanzekile. Awafuneki amathuthumbo wokuzenzela eendaweni la kusizelwa khona amakhastama.
Akube nama-eshithreyi aneleko eendaweni la kusizelwa khona amakhastama.
Iindawo la kusebenzela khona abasebenzi azihlale zihlanzekile ngeenkhathi zoke.
Amanothisi wabasebenzi akangafakwa eendaweni la kusizelwa khona amakhastama.
Omunye nomunye umsebenzi kufuze alekelele ukuthi indawabo yokusebenzela ihlale inesithunzi esihle ngeenkhathi zoke. Boke abasebenzi kufuze bembathe izambatho ezifaneleko zema-ofisini.
Azibe khona ngokwaneleko iincwajana eziphathelene nomsebenzi owenziwa ema-ofisini la, zibekeke kuhle ndawana la kusizelwa khona amakhastama.
Isiphetho
Njengoba sikholelwa ekuthini ukuqalelelwa kwamakhastama kuyisika yepumelelo yeBhanga yezeeNarha nje, umTlamo ongehla lo kufuze uhlale usetjenziswa ngeenkhathi zoke.
Boke abasebenzi abasiza amakhastama kufuze bona bafundiswe bathwasiselwe ihlelo lokusebenza ngamakhastama ekuthwasiswe ngalo nabasebenzi abathwasisa abanye. Ihlelweli lizakutjhayelwa zizazi ngezamakhastama nokuphathwa kwawo endaweni yekhethu le ( Client Service Champion.) Lokhu-ke kuzakwenza ukuthi iphumelele iminqopho yethu.
Nakube kukhona ongakutholisisi kuhle ngakho koke lokhu esikhulume ngakho ngehla, ungazazi ukuthintana nomNyango wezokuThengisa nezokuMaraga wakhethwapha.
